صباح/مساء الخير سعيدة جدًا بتفاعلكم على تدويناتي وانها
تصل لقلوبكم، تخلوني اتحمس اكتب، اليوم بتكلم عن الفوبيا/المخاوف بشكل عام وبشكل
خاص وتجربتي معاها.
أولاً ماهي الفوبيا؟ : خوف متواصل من مواقف أو نشاطات معينة عند حدوثها
أو مجرد التفكير فيها أو أجسام معينة أو أشخاص عند رؤيتها أو التفكير فيها. هذا
الخوف الشديد والمتواصل يجعل الشخص المصاب عادة يعيش في ضيق وضجر لمعرفة بهذا
النقص.
قبل سنتان أو اكثر مااتذكر صراحة، تعرضنا لحادث سيارة
كان جدًا بسيط لكن من بعدها واصابتني حالة خوف من السيارات خصوصا الركوب في المقعد
الأمامي! عمومًا انا شخص خواف أخاف من العديد من الأشياء لكن دائما أحاول التغلب
على مخاوفي بمواجهتها.
لأني اكيد لازم اسوق واخذ الرخصة كان أول تدريب لي
للحصول على الرخصة مع العزيز خالي الكبير، أول مرة حسيت ان بطني بينفجر من الخوف
والتوتر والقلق والمفاجأة بعد ان فريت الشوارع الفاضية طلعني خالي على الشارع
الرئيسي من أول مرة بحياتي! وكنت فعلاً فعلاً خايفة حاولت اهدأ وماانسى هالموقف
المخيف وبنفس الوقت مغامرة مرة الأيام وبعد التدريب مع المدرب حصلت على الرخصة لكن
في فترة من فتراتي قبل سنة تقريبًا تركت السياقة لفترة من الزمن وفترة شهور بسبب
الادوية ولأني ما اقدر اركز وكنت ناسية أي شي يخص السيارات وطبعًا أكيد حاولت اخذ
حصص إضافية للتذكر لكن افضل تعلم للسياقة هو انك تسوق بالشارع نفسه.
العناية بالقطط للمربين الجدد:
أنا في يوم من الأيام ماكنت اتخيل حتى اني راح اربي أو
أعيش مع قطو!
القطاوة كانوا حيوانات تخوف بالنسبة لي وماكنت اشوفهم
حلوين ابدًا وبالعكس أخاف حيل منهم للامانة كنت متعلقة بالكلاب وابي اربي كلب لان
وجود صديق روحي وحيوانات بالبيت شي جميل جدًا واصلا حتى مرات بالعلاج الاكلينيكي
يطلبون من المرضى بمرحلة معينة تربية حيوانات، ماقدرت اربي كلب وللامانة الخيار
الثاني كان تربية القطط بالبداية حسيت اني انانية اييب حيوان عشان يسليني ويونسني
فأجلت الموضوع سنة كاملة وأنا أفكر بالموضوع عدل ابي القرار ينبع من ذاتي واني
مسؤولة وأقدر أول شي قبل لا اربي واتخذ هالخطوة قررت كثر مااقدر اقرأ واقرأ واشوف
يوتيوب عن القطط وشلون الاهتمام فيهم واكلم رفيجاتي المربين واسألهم اكثر وأول
خطوة اتخذتها اني احدد الفصيلة اللي ابيها واقرأ عن كل فصيلة السكوتش فولد اخذت
قلبي لكن قررت اخذ فصيلة البرتش لان تناسب شخصيتي وشورت هير-شعر قصير- لان العناية
تكون اسهل من الشعر الطويل يحتاج عناية اكثر وأكبر وطبعًا القطط شخصياتهم تختلف من
ذكر/انثى وكل قط/ـة له شخصية مختلفة ومميزة نفس البشر، الصراحة مااذكر شنو السبب
اللي خلاني اختار ذكر عن انثى لكن احس ان الانثى شخصيتها اسهل واحلى من الذكر.
بعد القراءة والبحث والتفكير في 2019/2 قررت منار انها
تربي قطو وفعلًا يبت أول قط للبيت وانا طبيعتي فيني فوبيا منهم وكل اخواني خوافين
لكن كانوا متقبلين امي الوحيدة اللي كانت تتعامل معاه وتمسكه في أول الأيام كنت
حتى مااقدر امسكه! بس كنت انام بالمكان اللي ينام في تحت الكنبه عشان اتطمن عليه
أكثر خواتي كانوا يقولون اني كنت اتحلم فيه واسولف فيه وأنا نايمة من كثر ماكنت
حريصة عليه! شوي شوي صرت امسكه واحبه واشيله معاي.
أولاً لازم نعرف ان القطط مسؤولية وحب وعناية واهتمام
لازم كل هالاشياء موجودة ونعطيهم، لم نقرر نتبنى لازم نحط ببالنا مهما صار هالقطط
جزء مننا خلاص فرد من العائلة مالازم نتخلى عنهم بسهولة لان حرام يتعودون على
المكان والبيئة، مافي شي اسمه زهقت خلاص ماابي اربي يعني خيار التخلي عن القط لازم
يكون خيار أخير لكم، مثل ماقلت حرام ومشاعرهم تعودوا على المكان أول مرة يبت ليو
كان خايف وكله ينخش ماتعود الا بعدها بفترة، والقطاوة نفس اليهال-الأطفال- بالضبط
يبيلهم اهتمام وعناية والفرق بينها وبين الأطفال ان الطفل يكبر واهما لازم أطفال طول
حياتهم فيبيلهم اهتمام.
خلونا نمسك نقطة نقطة ونتكلم فيها عن القطط والعناية
والاهتمام:
1. الأكل :
في نوعين من
الأكل الويت فود-الاكل الرطب-، والدراي فود-الاكل الجاف- الاغلب يميل يعطي
القطاوة الدراي فود لكن انتبهوا من عمر القطاوة ويختلف حسب عمر القطط اذا كانوا
كيتين-صغار- أو كبار فيفضل انكم تستشيرون البيطري والشغلة اللي ماكنت اعرفها ان
الكيتن الصغار اللي أعمارهم اقل من شهرين ياكلون ويت فود ومايقدرون على الدراي فود
هنا فيديو يوضح الاهتمام بالقطط من ناحية الأكل للي أعمارهم اقل من شهرين
طبعًا تعطونهم حليب لكن حليب مخصص للقطط لان
القطط تتحسس من اللاكتوز فلازم تستشيرون طبيب بيطري لازم، والاكل ماراح انصح بنوع
معين لان يختلف من قط لي قط آخر يفضل تنوعون بالأكل وفي قطط مزاجية وفي قطط لا
تاكل أي شي فيختلف بطبيعة القط أو تقدرون تسوون اكلهم بالبيت تعطونهم دياي مسلوق
بماي بدون بهارات.
في نقطة لازم تنتهبون لها وأستغرب حيل منها
ان البعض غير مسؤول ويوكل القط أي شي حتى اللي حولي لما اقولهم لاتعطون ليو كاكاو
أو مثلاً أكل في بهارت بصل وثوم يضحكون علي ويقولون "حساسة انتي كل الناس
توكل قطاوتهم وترا قطو ياكل أي شي" لا طبعًا بما أني خذيت هالحياة وربيتها
فأنا مسؤولة عن اكلها وفي اكلات وخحايد تسبب مشاكل وتسممات للقط هنا بعض الاكلات
اللي تسبب تسمم وخطيرة للقطط والبعض يجهل هالاكلات للأسف منها الكاكو والحليب.
أفضل انكم تختارون الاكل حسب نوعية قططكم
والكمية ايضًا يكتب ورا كل اكل الكمية المناسبة حسب العمر ومهم تختارون الأكل حسب
العمر وابتعدوا عن نوعية الأكل السيئة لأنها تسبب مشاكل لقططكم مثل ويسكاس جدًا
سيئة للقطط وأنا ليو ياكل أي شي وملقوف بالاكل فدايمًا انوع له واغير اكله ومرة
بالشهر اعطيه ويت فود لكن لما ربيت ليو كان عمره أقل من شهرين شهر ونص تقريبًا
فكنت اعطيه دراي فود وأنا ماادري ان ماياكل ومو زين شريت له ويت فود مخصص لعمره
والطبيب وصاني على حليب معين للقطط الصغيرة بس والحمدلله كبر وصار خوش واحد.
2. صحة القط والعناية :
الشي اللي لازم يعرفه أي مربي للقط ان القطط تحتاج
ميزانية وتحتاج بيئة مناسبة للأسف الشديد لو ماعندكم هالشيين فيفضل تنطرون وقت
مناسب عشان تربون أحسن لكم ولهم بعد، الميزانية صراحة مو غالية حيل لكن يحتاج فلوس
والبيئة ماتقدرون تربونهم بروحكم يعني أنا لما اطلع من البيت واخذ وقت طويل عندي
احد يهتم بليو ويحبه نيابة عني لان اسمع عن ناس يحطون القطاوة بالحمام أو الحوش أو
يحطون اكل وماعنده احد ويتركونه فترة طويلة وانصدم! حرام وغلط حيل لا تربون اذا
ماتقدرون، انا مخصصة لليو غرفة والخدامة عنده لو رحت أو صار شي.
بالنسبة للتطعيم فأول شهور لازم يأخذ التطعيمات
عشان الأمراض يمكن 5 أو 4 تطعيمات ناسية والله بعدين تصير التطعيمات سنوية،
والتطعيمات ماتكلف حيل يختلف حسب الدكتور اللي تروحون له ولازم كل فترة تودون
قطاوتكم البيطري يكشف عليهم لازم.
اما بالنسبة للتعقيم فأنا عقمت ليو بعمر
6شهور ونص طبعًا مع استشارة البيطري، لان التعقيم وايد مفيد واصلا ماتقدرون
تتحملون القطاوة وتربونهم ويفيد القطو بعدين اما اللي ضد التعقيم فلازم تتحملون
انكم تيبون قطاوة وعدد كبير عندكم ويكون في ميزانية.
كنت اخلط له فيتامينات مع الأكل موجودة
صورتهم، والتمشيط ليو مايتعبني شعره ابدًا فأمشطه كل أسبوع مرتين اما اذا كانت
قططكم شعرهم طويل ضروري كل يوم تمشيط عشان مايتعقد ولم تلحس شعرها ضروري ماتاكله
لان بعدها تستفرغ أو تمرض مرات.
والعناية بالعين والاذن فأستخدم القطرات وطريقة
استخدامهم مكتوبة اهم شي مع قطن أو اعواذ اللاذن.
أما لاهم نقطة السبوح انا شخصيًا افضل اسبحه
مرة كل شهر أو شهرين لان كل يوم نمسحه بالمناديل فنظيف يعتبر والقطط تكره
الاستحمام، فأحس تعذيب اسبحه كل أسبوعين، ومرة سبحته بالبيت ومرة بالمحلات اهم
نقطة بالسبوح اهيا التنشيف لازم تنشفون القطو ولا يطلع فطريات وتنشفونه عدل عدل.
3. الاهتمام بنفسية القط:
أي مصدومين صح؟ نفسية! أي طبعًا الحيوانات
نفسنا تحس ولها مزاج يختلف عن حيوان عن آخر، مرة من المرات ليو كان بالحوش وطول
حيل وماكنا ندري وينه وندوره دواره آخر شي اكتشفنا ان بالحوش وبالحر! وقتها توتر
حيل ونفسيته تعبت تدرون شنو صار سوا نمبر 2 برا البوكس من التوتر، فمرات لما
يسوونها برا البوكس يكون من التوتر أو طلب تزاوج يعني في أسباب معينة لهالتصرفات
وبسبب النفسية.
4. الليتر بوكس لازم مكان معين ومايتغير الا للضرورة القصوى.
5. الماي لازم يتغير مرتين باليوم، والاكل يتغير حسب حجم القط والعمر.
6. خصص لوح خشبي أو السكراتش عشان القطاوة تشمخ في وماتشمخ الكنبات ولو كنتوا
متضررين انهم يشمخون الكنبات رشوا بخاخ على الكنب يمنع القطاوة تقرب من هالمكان
تلقونه بمحلات الحيوانات.
7. الأطفال الأطفال أول شي القطاوة مو لعبة لليهال ولو لعبوا معاه لازم شوي
شوي ومرات القطاوة يتأثرون ويخافون من الغرباء يعتمد على شخصية القطو فلازم
تراقبون لو كان في يهال بالبيت.
8. لازم تتأكدون ان ماكو احد يتحسس من القطاوة بالبيت ضروري خصوصًا القطاوة اللي
شعرها طويل.
9. قص الاظافر القطاوة كل أسبوع مرة أو أسبوعين،ولازم مقص خاص لاظافر القطاوة لازم مو مقص عادي! ولازم تنتبهون بطريقة القص هنا فيديو يوضح الطريقة وانتبهوا
لاتقصون وايد عشان ماتجرحون قطاوتكم يعني كونوا دقيقين وحريصين اذاتعبتوا وماقدرتوا تقدرون تودونهم محل يقص الاظافر أو البيطري.
10. لا تقصون شوارب القطط لانها أساس التوازن
وتساعده على الإحساس بالبيئة المحيطة للأسف اختي ماكانت تدري وقصت شوارب ليو أتذكر
بجيت وقتها لان حرام يتوتر حيل بس الحمدلله يطولون فانتبهوا وعلموا اهلكم على
هالنقطة.
وبس خلصنا الموضوع واي استفسار أو تبون زيادة بالموضوع
فهنا تقدرون تكلموني بدون لا اعرفكم.
تعليقات
إرسال تعليق