رحلتي في التشافي "البحث عن الخلاص"

" ثمة معارك لاىكون البحث فيها عن انتصار بقدر البحث عن خلاص.  "

رحلتي في التشافي أو البحث عن خلاص :

الرحلة التي اتخذتها بالشفاء كانت رحلة طويلة، مااقول اني شفيت 100% لكن منار اليوم احسن حيل من منار السنة اللي فاتت وكتبت تجربتي مع الاكتئاب هنا واكثر سؤال كان ينطرح علي لما كنت اقول فيني اكتئاب "شنو سبب اكتئابج؟" وبصراحة أكثر سؤال احسه مزعج لان مادري ! الاكتئاب مرض حاله حال أي مرض يصيب الانسان وأنا اعتقد ان صابني بسبب العديد من الأسباب ومنها الاختلافات البيولوجية وكيمياء الدماغ وتغييرات في الهرمونات وغيرها من الأسباب وطريقة التفكير لها دور في الموضوع.

وبصراحة حتى الحين وأنا اكتب هالتدوينة احس مو عارفة شنو اكتب؟ الأشياء اللي ساعدتني اتغلب على الاكتئاب بصراحة العلاج الدوائي كان له اثر كبير وواضح والعلاج الدوائي مايخوف يمكن يسبب اعراض جانبية لكن استمر حسب كلام الطبيب طبعًا.

و مع العلاج النفسي/الدوائي الذهن يكون صافي والانسان يبدأ حياته من يديد ويبي أحد يساعده ويوجهه وأنا صراحة كنت ابحث عن اشخاص يوجهوني ويمكن كنت ادور شخص ينقذني يشيلني من مكاني ويغيرني لكن ماحصلت، فقررت أساعد نفسي بنفسي أول شي كان التغلب على الأفكار الانتحارية بأني قلت ماراح انتحر وبكمل حياتي على الأقل عشان اهلي اخواني الصغار اللي أنا ركيزة ودعامة بالبيت لهم، موضوع انك تكون مكتئب بالبيت موضوع صعب ويمكن الاغلب مايفهمون مايعرفون شنو اكتئاب وطبعا أنا هني مااتكلم بس عن الاكتئاب عن كل مشاكل الحياة والتحديات.

 مرات الانسان مايعرف شنو سببه بالحياة ليش اهوا عايش؟ في ناس تأخذ الرحلة بكل حب وشغف وتبحث عن ذاتها وفي ناس تضيع وماتعرف أصلا وفي ناس ماتهتم "أصلا حمدلله اني عايشة" مو غلط ابدًا سواء كنت واحد من هالثلاث لكن المهم انك ما تقلل من قيمتك من نفسك وذاتك.

أول شيء عشان نعرف اسبابنا للعيش لازم نعرف شنو اهتماماتنا شنو الأشياء اللي تخلينا نقوم من النوم سعداء، انجازاتنا الصغيرة يابنات وياشباب ترا الإنجازات مو لازم تكون براقة مو لازم تكون شي كبير الحين مع الإيجابية والاوهام يخلقون لك انك "غير ناجح" لان ماعندك إنجازات كبيرة ، أنا شخصيًا قبل لا افتح المدونة قلت شنو اكتب ماعندي إنجازات براقة! لكن فكرة أنك تقاتل الحياة ومستمر فيها وتتنفس هواء هذا بحد ذاته انجاز! كلمتك الطيبة لغريب هذا انجاز انك تكف شرك عن غيرك هذا انجاز انك مشغول بتطوير ذاتك هذا انجاز بالفترة الصعبة بحياتي كرهت الإنجاز وكلمة الإنجاز لاني كمنار كنت مهووسة إنجازات كنت مهووسة ان يُخلّد اسمي واكون انسانة عظيمة مهووسة بهالامور، حتى في تطوير الذات كنت مهووسة اطور من ذاتي واصير شخص احسن وهالشي حلو لكن جلد الذات غلط مقارنتك بغيرك غلط ، لكل منّا طريقه الخاص تحدياته وقصته.

وتطوير الذات اللي اقصده اشوف الكل صاير هالفترة أما مهووس  أو معارض لتطوير الذات ، واشوف ان لكل شخص بيئته وافكاره الخاصة وأنت اخذ اللي يناسبك حتى بكلامي مرات أقول كلام ما يناسب بيئتك وطبيعتك

والايجابية بشكل مفرط للأسف غلط وأنا مريت فيها كنت كله أقول أنا إيجابية لدرجة اتجاهل الألم واقاومه ، المقاومة يعني انك تتجاهل الاحداث اللي تصير لك وكل ماقاومت راح تتعب وعشان تعرف عن المقاومة أكثر هنا صلاح الراشد متكلم عنها

فبدال لاتقاوم وتعطي جهد ركز على الأشياء اللي تبيها طبعًا أنا كنت اقاوم وكنت بعيدة عن تطوير الذات ليش لان كنت اشوفه يزيد من جلدي لذاتي  فمثلًا كنت دايمًا اسمع من المدربين "أنت سبب لكل مايحدث" "أنت نتاج أفكارك" مع اني ماكنت اخذ دور الضحية لكن كانت هالفكرة تزيد من جهدي وتزيد من جلدي لذاتي فوقفت ابعد عن كل شي يحسسني بجلد الذات أنا انسانة حيل احاسب روحي ماانام الا وأنا محاسبة روحي وعقلي ويتدخل حيل بكل الأمور عقلي يفكر بكل شي كنت قبل اشوف هالشي ميزة فيني ان عقلي مزعج بس بعدين فهمت ان مرض وغلط لما خذيت الادوية وصار عقلي صافي فهمت معنى الصفاء والسلام الذاتي فعليًا بفترة من حياتي ماكنت ابي الا شي واحد سلامي الذاتي

فقررت اني بطريقتي الخاصة اعالج الأمور حتى بدون تطوير ذات كل اللي سويته اني تقبلت مشاعري عادي عطي نفسج وقت تزعلين ابجي لاتخشين مشاعرج ادري صعبه مرات اللي حولنا يتضايقون من ضيقتنا فلازم نخش عنهم مشاعرنا لكن قعدي بروحج مو كل الوقت، وعطي نفسج وقت انج حزينة عبري عن الحزن بس لاتكتمينه بقلبج كنت وايد اكتم بقلبي أو كانت مشاعري باردة مااحس بشي ماكو شعور وماكو أسوأ من ان يموت الشعور داخل الانسان ، كنت اقعد مع الناس اللي احبهم وانا مو حاسة بشي.

التدوينة هذي يمكن اكثر تدوينة استجمعت شجاعتي عشان اكتبها اكثر من تجربتي مع الاكتئاب لان بتبين لكم اني مريت في لحظات مظلمة فقدت الأمل وعشت حياتي بدون أمل وبدون لا احلم بالاحلام وحسيت ان هذي مو منار ابدًا هذي مو انا لكن عطيت نفسي كل وقتها ماحاسبتها خليتها يمكن من 2018 انا مو منار أصلا مصدومة شلون الناس تعرفوا علي بهالفترة لان مريت فعلا باسوأ نسخة لمنار لكن اللي يضحك ان في ناس حبوها وانا ماابي ارجع نسختي القديمة المضيئة لا بالعكس ابي منار يديدة وبحبها.

طبعًا كتبت بتدوينتي الثقب الأسود ان أسباب اللي خلتني استمر بالحياة بعد مادخلت المستشفى وطلعت منها حطيت لي خطوط حمراء ان خلاص أوقف انتحر وترا فعلا كان لي محاولة بعدها وأفكار انتحارية ماهدت وراحت الا بفترة قريبة شلون؟ شنو سويت؟ ببساطة خلقت لي سبب للحياة! ماكنت ادري ليش انا عايشة ومو لازم الأسباب تكون قوية الانسان احيانًا يبحث عن رسالتة بالحياة وفي ناس تسخر كل حياتها للبحث عن رسالتها.

بالنسبة لي مااعرف شنو رسالتي لحد الحين بس اعرف ان من اسبابي استمراريتي عشان اهلي واخواني والناس اللي يحبوني وبنفس الوقت اهما سبب من الأسباب لكن لو زعلت منهم بيخف الشعور صح؟ عشان جذي حطيت سبب يضحك سبب بسيط هو اللي يخليني اكمل حياتي مانجا يابانية احبها تنزل كل أسبوع ببساطة كنت اقراها واتحمس وبصراحة بنزل موضوع شلون انقذتني هالأشياء البسيطة مثل الانمي والاغاني والتصوير.

 شي يضحك انها تكون سبب لحياة انسان صح؟ يمكن البعض بيقول هذا كلام غير منطقي ولازم الأسباب تكون دينية وغيرها والخ.. الدين امر مهم في حياة الانسان الانسان يحتاج للروحانيّات لكن في الاكتئاب انت تبتعد عن كل شي حتى الإيمان وانا دايمًا أقول ان في مرحلة الاكتئاب هذا اختبار عشان نرجع الحب والايمان لان الايمان مو شي ببساطة ينولد الايمان شي نكتسبه يمكن تكون محظوظ لأنك مؤمن لكن هل أنت ضامن ايمانك؟ واللي فقدوا ايمانهم هل يوفقون؟ المشكلة أتذكر سجلت فيديو لنفسي أتكلم في عن الايمان وكنت حزينة جدًا لان المقربين ماكانوا فاهمين اني احتاج وقت للايمان ولازم واهم نقطة لانجلد ذاتنا خنعطي نفسنا فرصة لو تحس بالذنب حاول وجاهد وتقرب وقوي ايمانك سو اللي يريحك المهم تكون مرتاح.

انا نفسكم وتعرضت لمواقف ماكنت ابي استمر حتى كنت اشوف الناس شغوفين بالحياة عندهم القدرة على القتال وانا ماعندي قدرة المحاولة يقولون ان الفشل هو الاستسلام وعدم المحاولة

 وأنا فعلًا ماكنت ابي أحاول حتى استسلمت لكن أحيانا في أمور لما نستسلم عنها احسن من اننا نتعب معاها بقولكم موقف في امر يخصني بحياتي كنت ارغب فيه بشدة بشدة كبيرة وما صار انكسرت وتحطمت لكن استمريت بالحياة يزعلي ان يصير للأشخاص الثانين وانا لا والأسباب وايد مرة ثانية انفتح علي نفس الباب وتحمست لدرجة كنت مو مصدقة معقولة! وردت اتأمل ورديت شخصية إيجابية وشخص ثاني سعيدة بشكل لكن ايضًا ماصار وانكسرت فعلاً انكسرت ووقفت اتأمل بشي حتى، وسكرت هالباب علي لكن حتى الحين لما اقولكم ما عندي أمل بكون جذابة في امل الانسان يحتاج الامل مع ان مرات الامل يكون سلاح ذو حدين يمكن يكون قاتل لو كثرنا منه نفس الإيجابية لكن التشاؤم والسلبية بتعيشنا بجحيم واحنا نبي نعيش الحياة بسلام بحب بإيمان في قلوبنا.

انا اشوف ان الإيجابية اللي تعلمنا شلون نتعامل مع نفسنا ونحبها ونغير طريقة تفكيرنا للاحسن هي شي جميل وبالعكس حلو لكن مانبالغ، الطريقة اللي  خلتني أوقف أفكار انتحارية اني أوجه افكاري هل أنا فعلًا مستعدة للعالم الآخر ؟ ليش اسبق وقتي؟ هل انا مستعدة اختفي من هالعالم؟ هل انا مستعدة اسمع واشوف حزن الآخرين وانا بعالم آخر ؟ محد يعرف الموت شي مجهول ومرات كنت ابدل الفكرة السلبية بفكرة إيجابية اوكي انا افكر انتحر بعدين ابدلها بالفكرة الإيجابية شوي شوي يتغير التفكير وبصراحة الخوف هو اللي فادني أي الخوف انا مااخوف الموت مثل ماالناس يخافونه بالعكس كنت مهووسة بهالفكرة لكن لما خفت خوف طبيعي تغير مفهومي وطبعًا هذي تجربتي واللي يفكر بأفكار انتحارية يحتاج زيارة اخصائي نفسي.

عمره الألم مايدوم مرده ينتهي لأن ايامك السيئة صدقني بتمر، لكن جهز نفسك كون قوي لما كانت تزورني نوبة اكتئاب كنت انخش بالغرفة بروحي عشان انهار لان محد كان يستوعب النوبة كانت شي مخيف شعور ان انا مو انا كنت ادور بروحي وانهار لكن اجهز احس نفسي مثل الجندي اللي يجهز درعه قبل المعركة ماكنت احب أقول لاخواني وخواتي عشان مايتأثرون لانهم صغار عشان جذي اخش عنهم، كنت اجهز أشياء بسيطة أفلام أغاني مسلسلات كتب اعطي النوبة وقتها وبعدها اهدأ شوي شوي اكتب اذا كان لي القدرة على الكتابة والكتابة سحر سحر يابنات وياشباب صدقوني مو لازم تكون كاتب لما تحس ان عندك مشاكل ومشاكل مرات محد يتحمل يسمع المشاكل انا انصحك تلجأ للكتابة تكتب وبعدها احرق الورقة ولاتلوم الأشخاص اللي تركوك بسبب انهم غير قادرين على الاستماع ابدًا لاتلوم أي شخص تركك لأي سبب من الأسباب خلك دايما منفتح القلب ومهما ابتعدوا اذا فيهم خير راح يرجعون العلاقات وجدت لتسعدنا واحيانًا نتحمل الحزن لكن في المعقول طبعًا بتقولي منار كلامج مناقض انتِ قلتي أطلب المساعدة والحين تقولين لاتفضفض؟ طلب المساعدة شي لازم لانك مهما كنت قوي تحتاج الناس مد ايدك واطلب المساعدة واطلبها من مختص ومن اللي حولك وبنفس الوقت الفضفضة الزايدة فقط لغرض السلبية افضل انك تكتبها بورقة لان مرات في ناس لما يفضفضون يحسون بشعور غريب غير جيد لانهم قالوا أشياء ومايرتاحون وابتعد عن الناس السلبية المحبطة العلاقات موجودة لنرتقي أو عشان نحس بالحب والسلام أنا فترة اكتئابي بعدت عن كل الناس سواء ايجابية أو سلبية عشان ارجع لذاتي وشوي شوي تفتحت للناس صج مرات حسيت بشعور الوحدة وفي ناس تركوني لكن المهم رجعت نفسي أو على الاقل صرت منار بأحسن نسخة لها بهالوضع الحالي.

بالنسبة لي حاليًا مهما سوت فيني الحياة بظل قوية لأني مؤمنة بقوتي مؤمنة اني اقوى وانا هذا درس للإيمان وللحب بذاتي، مهما عطتني الحياة أسباب عشان اتركها بلزق فيها بقولها وانا اضحك مو بسهولة بتركج بصير علّة على قلبها بعيش حياتي بمرها وبحلوها مهما مريت بأيام صعبة بجهز درعي وبحاول احاربها أو اتقبلها لانها بتمر. 

الشغف وحب الحياة ما اقول اني وجدته لكن فعليًا كنت ابحث عنه تخيلوا اني بحثت عن ذاتي وعن هوايات عديدة قعدت فترة اطبخ حتى اني طبخت حلويات الزوارة و هالفكرة كانت من خالتي نورا حبيبتي عطتني مبلغ مالي وتقولي طبخي حلا الزوارة وانا اللي ما اعرف شيء بالمطبخ مرات الحلا ينجح مرات لا بس كنت سعيدة وتعلمت التطريز وكنت اطرز وجدًا استمتعت بالتطريز مع اني تركته لدرجة حبي له طرزت هدايا لرفيجاتي باساميهم وصرت اغني بكل ثقة وبحب قبل كنت انحرج من صوتي الحين بالعكس اغني بثقة ومرة شريت غيتار وقررت اتعلم العزف ومرة قررت اتعلم الرسم وغير حبي للقراءة والمطالعة صارت لي فترة كان عندي بلوك للقراءة أو ما يعرف بعثرة القراءة ما اقدر اقرأ لكن حاولت اغير الكتب حاولت اقرأ بكل طاقتي في كتاب شاركني خصوصا بعد خروجي من المستشفى وقريته كامل في أسبوع بسبب اني ماكنت اقدر اركز كان الكتاب "كل الأشياء" للغالية بثينة العيسى يمكن تقول ان الكتاب يتكلم عن الاحداث السياسية في الكويت لكن رأيي الشخصي يقول ان جوهر الكتاب يتكلم عن علاقة أب مع ابنه.

حاليًا عندي أشياء وايد تخليني استمر بالحياة وانا مثلكم يمكن ايأس يمكن اطيح ويمكن مااقوم أصلا لكن القى حلول وهالامور مو حلول سحرية لا تحتاج وقت وصبر وتغيير في طريقة التفكير اعظم انجاز نسوي بحق نفسنا اننا نتعب على نفسنا واحنا أقوياء كلنا أقوياء ابحثوا عن ذاتكم اخذوا وقتكم ابحثوا عن اهتماماتكم انشغلوا بذاتكم ومو لازم نلقى تشجيع عشان اهتماماتنا احنا نشجع نفسنا وعالم الانترنت عالم رائع تقدر تلقى ناس نفس اهتماماتك وحتى لو ماشاركوك أنت شارك يمكن تكون سبب ان الناس تحب هالاهتمامات بالنسبة لي العزيزة كنكن الجوهرة صاحبة مدونة "الأعمال اليدوية للجميع" Crafty4all
وهنا رابط قناتها في اليوتيوب خلتني احب التطريز بشكل كبير حتى أمل العزيزة والغالية اللي احب اسميها نيتُ لما تطرز صرت اغار من لوحاتهم الفنية وابي سوي نفسهم وامي كانت تشجعني حيل بحكم شغلها وانها تعرف بالتطريز.

جربت اسوي لي مكان خاص مثلا اصنع لوحة واحط فيها كل الصور الشخصيات اللي احبهم والاقتباسات اللي تمدني بالقوة.

وصلنا لنهاية الموضوع أتمنى تكونون بخير أينما كنتم، أتمنى موضوعي خفيف لطيف وساعدكم ارجوكم لاتوقفون وتستسلمون استمروا وكملوا وخلوا ايمانكم بنفسكم كبير.

اللي يبي يسألني أي سؤال ومايبي اعرفه هني