شلون نتعامل مع العلاقات المؤذية؟

كيف أتعامل مع العلاقات الصعبة أو الأهل والأقارب المسببين للمشاكل؟

هنا أعرض تلخيصي وبعض أفكاري وشرحي لأمسية قدمتها الأستاذة هنده محمد وكانت جدًا جدًا مفيدة لي

 رابط الأمسية : هنا

أولاً : علي أن أتعلم واتحكم في مااستطيع التحكم فيه وليس إعطاء طاقة للاشياء التي لا استطيع التحكم فيها.

شنو يعني هالكلام يامنار؟

يعني طاقتي وجهدي ومشاعري ليش لازم تتركز واضيعها على غيري أو على أشياء أنا مااقدر عليها في آية في القرآن الكريم

وقوله : لا يكلف الله نفسا إلا وسعها ) أي : لا يكلف أحدا فوق طاقته ، وهذا من لطفه تعالى بخلقه ورأفته بهم وإحسانه إليهم)

وهذا الشي مذكور بالقرآن الله مايكلف أحد فوق طاقته لكن ليش احنا نتكلف ونسوي أشياء فوق طاقتنا وفوق التحمل قريت مرة تويته بتويتر كتبتها وحدة راح اذكر رابط التويته هنا

والتويتة بأختصار تتكلم عن بنت تعودت تشيل أسطوانة الغاز مع انها تعبانة والموضوع له مشقة عليها لكن زوجها تعود على منظرها وأصبح الأمر معتاد عند زوجها إلى أن مرة من المرات ماقدرت تشيل الأسطوانة وعاتبها لانها ببساطة عودته وهالموقف نقيس مع العديد من المواقف بحياتنا ، في أشياء بيدي أقدر عليها وأقدر اتحكم فيها اعطي كل جهدي لكن في أشياء اصعب مني اتركها ببساطة لكن منار صعب هالشي ومن هالكلام ببساطة بقول لين نصير اقوى واحسن راح اقدر عليها.

النقطة المهمة أيضًا اللي ذكرتها أستاذة هندة محمد:

·       أنت لاتستطيع تغيير الأشخاص في حياتك

·       أنت تستطيع التحكم في ردة فعلك وليس الشخص نفسه

·       أنا اتحكم في ذاتي وليس الآخر

خلونا نمسكهم حبة حبة

للأسف البعض يحاول بكل قوته وبكل طاقته ومشاعره أن يغير الآخر سواء الآخر كان ولدج بنتج ابوج امج زوجج اختج أي علاقة دخلتيها، أنتِ ابدًا ابدًا ماتقدرين تغيرين أي أحد والتغيير يبدأ في داخل الشخص نفسه وذاته وبعدين لما تقعدين تحنين على التغيير بيصير الشخص نفسه ينفر منج ومرات تجرحينه

ادري بتقولين لي: "منار هذا الشخص سيء ابيه يتغير للأحسن وابي مصلحته"

للأسف الشديد وخنكون واقعيين هذا الشخص ما راح يتغير تقبلي هالشي

لكن وهي النقطة الثانية أنتِ تقدرين تتحكمين بردة فعلج أنتِ مو الطرف الآخر تقدرين تتحكمين بمشاعرج، بتسألين شلون؟ بقولج في تحكم ذاتي وتحكم خارجي التحكم الخارجي هو ردات الفعل وبالتحكم الذاتي لازم نركز على نقطة أي شي يأتي من الخارج يعاكس التوقعات راح يعطيني معاناة يعني لما نرفع سقف توقعاتنا وهذي هي المشكلة التوقعات التوقعات يمكن من الأسباب وواحدة من الأسباب لكن مو كلها اللي دخلتني بالاكتئاب كانت الخذلان لاني ببساطة انكسرت وانخذلت من شخص مفروض يكون سندي بالحياة! ببساطة قعدت مع نفسي وقررت ابدأ رحلة طويلة بداية كرهته وحطيته سماعة لاخطائي لكن قررت اسامحه لاني راح استمر مع هذا الشخص بالحياة وكانت مشاعري متضاربه احبه واكرهه بنفس الوقت! فقعدت مع نفسي شفت ان المشكلة تكمن في توقعاتي العالية على أي أساس توقعت ان بيساندني لأن قريب مني؟ ببساطة يمكن الأشخاص اللي نعتبرهم سند لنا يكونون أحيانًا عائق في حياتنا في أحلامنا والحل نخليهم يكسرونا؟ يسيطرون علينا؟ لا نخفف توقعات مانتوقع من أي احد أي شي سواء سلبي أو إيجابي نعيش مرتاحين لأننا خففنا توقعات الموضوع مو بسيط انصحج تقرين تدوينتي وتسمعين لأمسية الأستاذة هنده محمد وتقعدين مع نفسج وشوي شوي راح تشوفين أن الأمور تنحل

في تمرين طرحته في الأمسية:

لما تلقين نفسج تحسين بالزعل بالغضب والمعاناة جيبي ورقة وقلم و:

1.    كتبي توقعاتج عن هذا الشخص شنو كنتي تتوقعين منه؟

2.    كتي شنو اللي لازم يسويه عشانج وشنو اللي مايسويه؟

3.    بعدها كرري "هو لم يعطيني حب حنان ....." وكل شي مايعجبج فيه وقولي "من اليوم أنا ممكن رفعت سقف توقعاتي شوي وحاليًا بالفترة هذي راح اخفف سقف التوقعات واتقبله كما هو"

4.    أي مشكلة تصدر من هالشخص وسببها توقعي خلاص ماراح ازعل منها

لازم نتقبل الأشخاص داخليًا والقبول موضوع طوييييل ويمكن يأخذ مننا فترة لكن مو صعب القبول والمسامحة ماتعني أني خلاص انسى السيئات اللي سواها الشخص في حقي ماتعني اني اغير طريقة معاملتي اللي تريحني مثلا عندي علاقة انا قطعت فيها لان ببساطة قرب هالشخص لي يسبب لي آلام مع ان الكل يقولي ليش قطعتي ولازم تصلينه ومن هالكلام لكن قررت اسامحه على الضرر اللي سواه أول شي ليش أسامح؟ أنا اسامح عشاني وعشان نفسي عشان اقدر امشي بأيامي لو قعدت مكسورة وحزينة لي متى؟ طيب بقعد أخذ دور الضحية؟ وهالشي أكبر غلط

لازم نتخلى عن توقعاتنا بالأشخاص والتوقع الوحيد اللي نتوقعه بحياتنا من الله فقط الله هو اللي يعطينا الله هو الرازق عند الله نجد المحبة النور السلام وفي ذواتنا فقط الناس تروح وتجي ماعليك لاتخاف من الوحدة.

غالبًا الناس اللي نعاني معاهم وعندهم صفات معينة وواضحة هالصفات ويجتمع عليها عدد كبير من الناس فلازم تفهمين انج أنتِ مو المشكلة.

اهم نقطة هي نظرتي لذاتي شلون اشوف ذاتي؟ امسكي ورقة وقلم وكتبي كل شي بخاطرج وقعدي مع اللي كتبتيه من وين اخذتي هالأفكار؟ مثلا حلم حياتي كان اني أكون طبيبة وكنت فعلًا مكسورة لان مادخلت هالمجال بسبب فاصلة بالمعدل قعدت مع نفسي وبعد فترة طويلة يمكن سنتين أو اكثر فهمت أن فكرة الطب كانت مزروعة بسبب الناس اللي حولي مو أنا، منار تبي تساعد الناس تبي تكون شخصية مؤثرة صج أحب الطب وعالمه وعلمياته لكن كفاية وستوب الوم ذاتي بسبب فاصلة

ونفس المثال لما وحدة تقولج انا قبيحة/متينة من وين اخذت هالافكار عنها ببساطة تلقينها من محيطها الناس اللي حولها أو تصير مشكلة بينها وبين شخص وتعطي نفسها تعريفات بناء على ردة فعل هذا الشخص لا ستوب هذي مو أنتِ أفكار الناس وارائهم وتصرفاتهم معاج مو أنتِ أنتِ وحدج تعرفين ذاتج لاتخلين أحد يقيمج تعريفاتج لنفسج لازم تكون نابعة من ذاتج ومن ايمانج بنفسج وبالله مو من تصرفات الناس معاج

يعني شنو ايماني بذاتي؟

ببساطة ثقتج بنفسج مااقول اني وصلت لمرحلة الايمان الذاتي انا نفسج كنت مااحب ذاتي كنت مااعرف الأشياء اللي احبها ولا اعرف شي عن منار لكن من 15 كنت أحاول اطور من ذاتي اطور من نفسي اتعلم عني واتعلم لكن ذكرت في تدوينة الثقب الأسود قصتي مع الاكتئاب وشلون خلاني انسى نفسي واقعد بأسوأ فترة مني فقدت فيها الايمان بذاتي وبذكائي بجمالي بكل شي لكن شوي وخطوة خطوة قاعده استرده.

في تمرين ذكرتة أيضًا بالامسية:

·       كتبي الأشياء اللي آمنتي أنها فيج وخليتيها تعريفات عنج وبنيتيها من ردات فعل الآخرين.

لازم نعرف شغلة وحدة أن الناس نعمة من الله ورسالة، والعلاقات موجودة عشان نسعد من ذاتنا والانسان كائن اجتماعي بطبعه أكيد أحيانًا نحتاج أوقات تخصنا بروحنا لكن نحتاج الناس في حياتنا نحتاج العلاقات والحب في حياتنا

اذا انا سمحت للطاقة السلبية انها تكون موجودة في حياتي بسبب الأشخاص فلازم اسامح نفسي واكون حازمة وابتعد عن طاقة الكره ابتعد عن اني اكره لان الكره راح يشغلج حيل وراح يأخذ وقتج وبدال لاتتقدمين تتأخرين ليش؟ تقبلي الشخص كما هو، ونعتمد على الله فقط ونتوكل عليه والله راح يرسلنا اشخاص فيهم الصفات المحددة اللي نبيها بحياتنا.

راح نوقف نرتبط بالمعاناة من اليوم ماراح نعاني من العلاقات وباللحظة اللي اكتشف فيها اني اعاني اسوي هالتمرين:

·       ارجع خطوة للوراء واسأل نفسي

·       ليش اعاني؟

·       شنو الشي الخطأ اللي وقعت فيه؟

·       هل انا أتوقع زيادة عن اللازم؟

·       هل انا أحاول اغير الشخص الآخر؟

وشوي شوي نبدأ نتخلى ونعود لسلامنا  الداخلي ماكو اهم من السلام الداخلي صدقيني أنا يتني فترات ماابحث عن ولا شي بالحياة بس ابي السلام والراحة العقلية بس وترا مهما تقولين صعب أنتِ تقدرين ترجعين خطوة للوراء مهما كان الوضع متأزم تقدرين تردين لحالة الهدوء والاسترخاء

·       خفضي الأهمية شنو يعني مهم؟ لا الأهم سلامي الداخلي وثقتي بالله

·       كل شي لصالحي مهما كان ظاهره شر فهو خير

·       خففي التوقعات واللوم من الآخر بما انج ماتحبين أحد يلومج لاتلومين الناس اللوم ماراح اييب الخير وقفي تعطين اللوم طاقتج

·       لاتحسسين ان الآخر مقصر انتبهي لتصرفاتج وافهميها

·       خففي مقاومة لاتقاومين ناحية التصرفات اللي تزيد من انزعاجج

·       جربي داخليًا مو بالخارج دايما كرري ان كل شي عادي عادي

·       آمني ان كل شي فيه خير عشان تشوفين الخير بحياتج

ندخل في نقطة الوضوع مع الذات

·       مالذي اريد ان اراه في حياتي؟

اذا ركزت على المعاناة ببساطة راح تجذبينها يمكن في ناس ماتصدق قانون الجذب لكن الأشياء اللي افكر فيها واركز عليها بتصير معاج

·       مالذي ارده في العلاقات مو من اشخاص محددين؟

·       كتبي ماهي الأشياء التي تريدين رؤيتها في حياتك؟ وتكلمي عنها مع نفسج

مثلًا تبين حب عطي نفسج حب أكثر وقبول تقبلي ذاتج لاتدورين الحب من برا وأنتِ ماتحبين ذاتج شوفي ادري جملة"حبي نفسج" نسمعها من الكل لدرجة صارتلي فترة كتجربة شخصية كرهت هالجملة ولا ابي اسمعها لكن صدقيني كل شيء يبدأ من حب الذات لاتنطرين حب من احد حبي انتِ نفسج عطي المشاعر اللي تبين تشوفينها في حياتج

تعلمي واقري اكثر عن المخاوف وشلون تتعاملين معاها انا شخصيًا استخدم طريقة المواجهه الاستاذه هنده اقترحت انج تبحثين وتطلعين على مقالة صلاح الراشد كيف تتعامل مع الأفكار السلبية وكتاب سوف تراه عندما تؤمن به

وتعلمي واقري اقري كثر ماتقدرين لما صابني اكتئاب تدرون شنو سويت لما اخذت تشخيصي طبعًا رحت ببساطة قريت كتب عن الموضوع صج ماكملت بعضهم لكن قعدت برحلة مع نفسي مو عشان استعيد منار القديمة لا بالعكس تقبلت منار المكتئبة لان كنت في مرحلة طويلة من الانكار والحين انا استقبل منار يديدة واتقبلها بكل حالاتها

كوني واضحة بالاشياء اللي تبين تشوفينها بحياتج وشنو اللي تسعين له، نبشي-ابحثي- عن ذاتج وخذي وقتج الطويل وكوني واضحة لاتلفين وتدورين وضحي لنفسج شنو تبين تشوفين بحياتج وتعلمي تقنيات الحوار ابحثي انا شخصيًا كنت داخلة دورات بالحوار وبدخل دورات شلون اتحاور مع الشخصيات الصعبة في موقع دورات اون لاين يقدم لج دورات بأسعار رمزية

لما يكون عندج مشكلة ركزي على حلها مو الشكوى منها اكيد عطي نفسج وقت واشتكي اشتكي افضل انج تشتكين لنفسج عن طريق الورقة والقلم لكن بعدين ركزي على الحل مرات نقعد مع ناس نعطيهم الحل نلقى انهم مايبون يسمعونه يبون يشتكون وبس ووضحي للناس منو انتِ وشنو تبين كوني واضحة مع الناس

تقول هنده بعد تطبيق كل ماقيل ولكن لازلت تواجه صعوبة هنا حاولي تلقين حلول خارج نطاقهم

كل ماكانت ذبذباتي طاقتي عالية وفيها سلام داخلي وطمأنينة ورضا وامتنان وشكر على حياتي كلما فتحت لي الأبواب.

في أشياء اسمحي لها ان تحدث وفي أمور ارفضيها ببساطة تعلمي الرفض مهما كانوا ومنو اهما انا انعرض علي موضوع وبالواقع ماكان عندي خيارات الا القبول وكانوا يجبروني المقربين عن طريقي لومي أو استفزازي بمشاعري خصوصا التلاعب بالمشاعر والعوطف "احنا نحبج اذا كنتي تحبينا سوي جذي" ببساطة قلت لا بالرغم الزعل بالرغم العصبية كنت قوية وقلت لا لان ماكنت جاهزه في هذاك الوقت وبعد فترة تقبلوا واللي ماتقبل مايهمني تعلمت اكسب ذاتي لان في أمور ذاتي أولى لكن خنوضح نقطة في ناس احيانًا المقربون منها أولى منها اهيا جذي طبيعتها اهيا تحب ترضي الناس وترتاح جذي انا اقولج كمنار سوي اللي يرضيج لكن من غير ندم لاتندمين على قراراتج محد يعرف حياتج واولوياتج كثرج انتِ

لازم نحد حدود ونكون حازمين مو عادي يستخدمون العنف معاج مو عادي يأذونج سواء نفسيًا جسديًا كوني حازم واسعي انج تعلمين الناس بالاشياء المسموحة لج في حياتج والغير مسموحة مثلًا انا مااحب احد يقلل من شأني أو يناديني غبية وفعلًا قطعت علاقة مع شخص لانها قللت مني حيل وكله تقولي ياغبية مع اني حذرتها وبلغتها بأني مااحب هذا الشي وطبعًا في حالات العنف وغيره أول خطوة دوري الحلول السليمة لو مانجحت الجأ للقضاء مو غلط ولا عيب مشكلتنا اننا نخاف ويكون مزروعة فينا مخاوف وبصراحة أنا بعد أخاف الجأ للقضاء لاني أخاف من اللوم لكن بحاول معاج ابدأ رحلة واغير من ذاتي عشان جذي فتحت هالمدونة.

في ردات فعلج اختاري دايمًا ردات الفعل اللي مافيها معاناة أو ألم وتأكدي بأن عندج القوة الاملة والانتباه والوعي لفعل ذلك فاختاري ردات فعل هادئة جدًا وإيجابية وجميلة افضل من ردود فعل غير مفهومة

ونرجع للمرة المليون نكرر عشان تثبت الفكرة تخلي عن فكرة تغيير الآخرين وركزي على فكرة تغيير ذاتج أنتِ وشلون تنتقلين لشخص أفضل

وفي نهاية المدونة بقول شي لازم نخفف تعلق بالآخرين لأن الحب مو منهم لاتتعلقين بشخص لانج تحتاجين الحب لأن هالشخص مايدوم يمكن يتغير يمكن يروح من حياتج مااقول لاتحبين لكن مثل ماقلنا نخفف توقعات عشان ذاتنا.

شكرًا للأستاذة هنده ولأمسيتها وشكرًا لانج قريتي هالتدوينة للنهاية

أي استفسار او كلام وماتبيني اعرفج تقدرين تكلميني هني